《由開Whatsapp group開始，已註定我愛上她》(43)
「我到了，在妳家樓下。」
「那我現在下來吧。」
在她未走出家門來到大廈門口前，
我在腦海中把構思好的對白重演一次，
免得一會兒張口結舌，沒有說服力。
又回到這個大門前，看著路上屬於我的長身影。
霖：「對唔住啊，要你係度吹風。」
我：「唔緊要啊，妳仲怕凍，我寧願我食風好過妳企係度變雪條。」
霖：「你食左飯未？肚唔肚餓？」
我：「妳唔講我唔覺，今日諗左成日野，諗到唔記得食飯...」(鋪路)
霖：「咁我地去附近食野啊，我帶你去。」
我：「好啊...」
霖：「不過...鍚我一啖先，可唔可以？」
我在她帶點粉紅的臉頰輕吻一下，她甜笑了，
她身體自然散出的香氣也痳醉我因長思夜昐的頭痛，她是靈丹，是妙藥。
她拉著我的手，又是走得比我前，一邊步向不遠的廣場，
一邊雀躍的說她這幾天的經歷。
我問她有否遇到危險，例如走進那些像鬼片的廁所，
然後有人割開妳的身子，拿走妳的器官變賣。
她打了我一下，說這幾天的天倫樂令她忘憂，好似回到兒時的三人行。
我說笑問她「妳好多擔憂咩？」，怎樣把自己說得像一位害怕變老的中年女人。
她只笑了笑，說一會兒再告訴我多一點。
我也說一會兒也和妳分享我最近的事，她點點頭，然後我們又在拖著手，
腳步慢了一點，在兩旁的大樹下，緩緩走著。
她帶了我到Food Court 的一角坐下，我先去叫餐，然後是她。
她離座的短短時間，一向不善辭令的我想再練習一下，
但是，身處於這個Food Court，令我像回到一個月前的朗豪坊。
她回來了，練習的心情還是被思緒打亂，
她捧了一份日本炒面與燒餅回來。
霖：「估唔到你鍾意食Pepper Lunch。」
我：「嗯...我都係第二次食，真係好好味，唔怪得啲同學次次都食...你呢？妳好鍾意食日本野？我同親妳食飯都係日式野。」
霖：「我諗唔到食咩，次次都係叫呢個，可能係習慣。」
我：「岩岩講到妳話爸爸媽媽好耐未試過一齊朝早起身飲茶。」
霖：「嗯，繼續講埋先，其實我地好耐都未試過一家人去玩，夜晚我仲同媽咪好似朋友咁傾計。」
我：「女仔係唔同啲......」
霖：「佢話好似好耐都無陪過我，佢有佢地忙，我有我番學，但係佢話無唔記得我呢粒女。」
我：「你爸爸同媽媽關係唔好所以今次搵機會去下玩？」
霖：「我夜晚個時都有問我媽媽，點知佢話無，不知幾好，爸爸每日都會車媽媽番工。」
我：「可能佢地都開始老，想慢慢安定落黎。」
霖：「佢話原來今次既突然旅遊係為左我。」
我：「為左你？你搞緊離婚咩？」(一秒後，我才自覺口快說錯話)
霖：「佢地話...(幸好，她好像沒有聽到最後一句)，佢地話我呢排好似好唔開心，好無心機，可能因為呢排我成日都無出街唔食飯」
我：「咁你又真係瘦左啲既...佢地知唔知道你有拍拖？」
霖：「我無主動同佢地講，但係之前有次佢送我番屋企個時撞到我媽媽，然後我又成日焗蛋糕，傾電話，佢應該都知既...」
我：「咁妳媽媽都有過少女心事...應該明白妳。」
霖：「所以佢可能都知我分左手。」
我：「咁你有冇同佢講妳搵到新一段感情？」(我捉著她的手)
霖：「嘻！」
她向我說了很多，對話很自然很流暢，
流暢得有如一對好朋友多於戀人。
當我問她的家人知不知道她有拍拖，我以為主角會是我。
所以當她以「之前」入題時，我有過一絲落幕，但期待她再說下去。
我的話像把一顆小石頭投進大海，想激起大浪，然而湖水只氾起點點水波。
Search